किसान पुत्र आंदोलनाची भूमिका राजकीय मंचावर आणणार – क्रांतिसेना

बीड : किसान पुत्र आंदोलनाची भूमिका रास्त असून देशातील दारिद्र्य आणि बेरोजगारी संपविण्यासाठी शेतकरी विरोधी कायदे रद्द झाले पाहिजेत ही भूमिका अखिल भारतीय क्रांती सेनेच्या माध्यमातून राजकीय पटलावर आणण्याचा प्रयत्न आगामी चिंतन शिबिरात होणार आहे, असे प्रतिपादन अखिल भारतीय क्रांतिसेना पक्षाचे अध्यक्ष संतोष तांबे पाटील यांनी केले आहे. बीड येथील बैठकीत हा निर्णय झाल्याचे त्यांनी सांगितले.

भारतातील जातीय तेढ, धार्मिक आगपाखड, बेरोजगारी, दारिद्र्य हे सर्व प्रश्न एकाच वेळी सुटून समृद्ध अर्थ व्यवस्थेसाठी शेतकरी विरोधी कायदे रद्द झाले पाहिजेत आणि त्यासाठी राजकीय मंचावर एक व्यापक चळवळ उभारण्यासाठी अखिल भारतीय क्रांतिसेना पक्ष हा विषय अजेंडा म्हणून राबवले आणि त्यासाठी राज्यभर चिंतन शिबिर घेण्यात येतील. त्यातील पहिले चिंतन शिबीर औरंगाबाद येथे लवकरच घेण्यात येईल, असे यावेळी अखिल भारतीय क्रांतीसेना पक्षाचे सरचिटणीस नितीन देशमुख यांनी सांगितले आहे.