करजगाव येथे बिबट्याच्या झडपेत तरुण जखमी

आंबी प्रतिनिधी : राहुरी तालुक्यातील नदीकाठ लगतच्या गावांमध्ये बिबट्यांचे हल्ले मोठया प्रमाणात वाढले आहेत. पाळीव व वन्य प्राण्यांना भक्ष करणारे बिबटे आता मनुष्यांवरही दिवसाढवळ्या हल्ले करत आहे. अशीच घटना करजगाव-बोधेगाव रस्त्यावर शनिवारी (दि. २८) सायंकाळी पाच वाजेच्या सुमारास घडली.

करजगाव येथील तरुण सोमनाथ कोतकर मित्र अमोल लोंढे यांच्यासोबत श्रीरामपूर येथून आपल्या मुलीसाठी औषधे घेऊन परतत असताना बिबट्याने त्यांच्या दुचाकीवर झडप घातली. त्यामुळे दोघेही तरुण गाडीवरून खाली पडले. त्यांनी जोरजोरात आरडाओरडा करून गाडीचा हॉर्न वाजवल्याने बिबट्याने शेजारील उसाच्या शेतात धूम ठोकली. त्यामुळे काळ आला होता पण वेळ आली नव्हती म्हणत जखमी सोमनाथ कोतकर या तरुणाने घर गाठले. कोतकर यांच्या हाथ व पायावर गंभीर जखमा झाल्या असून श्रीरामपूर येथील खाजगी दवाखान्यात ते उपचार घेत आहेत.

‘करजगाव परिसरात बिबट्यांचे हल्ले चिंता वाढवणारे आहेत. ग्रामस्थांनी कुटुंबाची व पशुधनाची काळजी घ्यावी. वन विभागाकडे सदर भागात पिंजरा लावण्याची मागणी केली आहे. ग्रामपंचायतीमार्फत वन विभागास सर्वतोपरी सहकार्य केले जाईल.’

~ शनिफ पठाण (सरपंच करजगाव)