कुकडीच्या आवर्तनासाठी वेळ आली तर रस्त्यावर उतरू- राजेंद्र म्हस्के

श्रीगोंदा/ सुभाष दरेकर : तालुक्यात मोठ्या प्रमाणात शेतकऱ्यांनी फळबाग लागवड केल्या आहेत. यात लिंबू, डाळींब, द्राक्षे आदी फळबागांचे प्रमाण जास्त आहे. परंतु मागील कुकडीचे हक्काचे रोटेशनचे पाणी मिळाले नाही. चार्यासुद्धा ओल्या झाल्या नाहीत. त्यामुळे तालुक्यातील फळबागेला पाणी राहीले नाही. फळबाग जगली पाहिजे त्याचबरोबर मुक्या जनवरांना पिण्यासाठी पाणी मिळाले पाहिजे. कुकडीच्या आवर्तनासाठी वेळ आली तर रस्त्यावर उतरू, असा इशारा राजेंद्र आबा म्हस्के यांनी दिला आहे.

राजेंद्र आबा म्हस्के म्हणाले की, पिंपळगाव जोगा मधील डेड स्टाॅक चे पाणी काढून अनेक वेळा फळबागेला व पिण्यासाठी पाणी दिले आहे. त्याप्रमाणे यंदाची उष्णतेची तीव्रता लक्षात घेऊन व मागील कुकडीचे रोटेशन अपूर्ण राहिल्यामुळे पाण्याचा प्रश्न ऐरणीवर आला आहे. शेतकऱ्यांच्या फळबागा व जनवरांना वाचवायचे असेल तर कुकडीचे आवर्तन सोडणे गरजेचे आहे.

 

पुढे बोलताना म्हस्के म्हणाले की, तालुक्यात तीन चार सल्लागार समितीचे सदस्य असताना देखील मागील कुकडीचे हक्काचे पाणी मिळाले नाही. मग पदाचा तालुक्यातील शेतकऱ्यांना काय फायदा ? सल्लागार समितीच्या सदस्यांनी आपल्या पदाची ताकत वापरून शेतकर्याच्या फळबागेला व जनवरांना पिण्यासाठी पाणी मिळवून द्यावा अन्यथा आम्ही रस्त्यावर उतरू, असा इशारा राजेंद्र आबा म्हस्के यांनी दिला आहे.