महात्मा फुले कृषी विद्यापीठ, राहुरी येथील भारतीय मृद विज्ञान संस्था- शाखा राहुरी देशपातळीवरील सर्वोत्कृष्ट पुरस्काराने सन्मानित

राहुरी विद्यापीठ : महात्मा फुले कृषी विद्यापीठ, राहुरी येथे कार्यरत असलेल्या भारतीय मृद विज्ञान संस्था शाखा राहुरी यांना मृदविज्ञानासंबंधीच्या उल्लेखनीय कार्याबद्दल देशपातळीवरील सन 2025 साठीचा सर्वोत्कृष्ट भारतीय मृद विज्ञान संस्था शाखा या पुरस्काराने सलग दुसऱ्या वर्षी सन्मानित करण्यात आले.

तामिळनाडू कृषी विद्यापीठ, कोइंबतूर येथे दि. 18 ते 21 नोव्हेंबर, 2025 दरम्यान भारतीय मृद विज्ञान संस्था, नवी दिल्ली आणि तामिळनाडू कृषी विद्यापीठ, कोइमतूर यांच्या संयुक्त विद्यमाने 89 व्या वार्षिक संमेलन व राष्ट्रीय परिसंवादाचे आयोजन करण्यात आले होते. या कार्यशाळेमध्ये देशभरातील विविध कृषी विद्यापीठ तसेच संशोधन संस्थांचे सुमारे 300 शास्त्रज्ञ, संशोधक सहभागी झाले होते. देशपातळीवर सध्या भारतीय मृदविज्ञान संस्थेच्या एकूण 53 शाखा कार्यरत आहेत. या शाखांचे वर्षभरातील कार्याचे सादरीकरण तामिळनाडू येथे झालेल्या परिसंवादा दरम्यान करण्यात आले.

मृद विज्ञान विभाग, महात्मा फुले कृषी विद्यापीठ, राहुरी अंतर्गत कार्यरत असलेल्या भारतीय मृद विज्ञान संस्था शाखा, राहुरी यांचे मार्फत सन 2024-25 मध्ये विद्यार्थी शेतकरी आणि संशोधक यांच्यासाठी राबविलेल्या विविध उपक्रमांचे सादरीकरण कोईमतुर येथे करण्यात आले. यामध्ये आंतरराष्ट्रीय मृदा दिन, राज्यस्तरीय परिसंवाद, मृदा आणि पाणी परीक्षण प्रशिक्षण, प्रक्षेत्र भेटी इत्यादी उपक्रमांचा समावेश होता. या कार्याची दखल राष्ट्रीय पातळीवर घेण्यात आली.

चार दिवसीय संमेलनाच्या समारोप कार्यक्रम दरम्यान महात्मा फुले कृषी विद्यापीठ, राहुरी येथील मृद विज्ञान विभाग येथे कार्यरत असलेल्या भारतीय मृद विज्ञान संस्था शाखा राहुरी यांना सलग दुसऱ्या वर्षी सन 2025 साठीचा सर्वोत्कृष्ट कार्यासाठीचा पुरस्कार देऊन सन्मानित करण्यात आले.

राहुरी शाखेचे अध्यक्ष डॉ. भीमराव कांबळे, शाखेच्या सचिव डॉ. रितू ठाकरे, शाखेचे खजिनदार डॉ. श्रीगणेश शेळके आणि मृद विज्ञान विभागातील सहभागी शास्त्रज्ञांनी हा पुरस्कार पश्चिम बंगाल येथील बिदनचंद्र कृषी विद्यापीठाचे कुलगुरू डॉ. ए. के. पात्रा यांच्या हस्ते समारोप कार्यक्रमात स्वीकारला. हा पुरस्कार मिळाल्याबद्दल महात्मा फुले कृषी विद्यापीठाचे कुलगुरू डॉ. शरद गडाख, संशोधन संचालक डॉ. विठ्ठल शिर्के, अधिष्ठाता डॉ. साताप्पा खरबडे, विस्तार शिक्षण संचालक डॉ. गोरक्ष ससाणे यांनी संबंधितांचे अभिनंदन करून कार्याचे कौतुक केले आहे.