राहुरी शहराच्या विकासासाठी माजी मंत्री तनपुरे यांनी शिवसेनेत यावे – देवेंद्र लांबे पाटील

शिवसेनेचा “१०० रुपयांचा बॉंड” जाहीरनामा प्रसिद्ध; विरोधकांमध्ये खळबळ

राहुरी (प्रतिनिधी) – राहुरी नगरपालिका निवडणूक प्रचारादरम्यान माजी मंत्री प्राजक्त तनपुरे यांनी केलेल्या विधानावर शिवसेनेने थेट प्रत्युत्तर देत राजकीय वातावरण तापवले आहे. राहुरी शहराचा विकास साधायचा असेल तर शिवसेना नेते तथा राज्याचे संवेदनशील उपमुख्यमंत्री व नगरविकास मंत्री एकनाथ शिंदे यांच्या माध्यमातून भरघोस निधी उपलब्ध होऊ शकतो, असा ठाम दावा शिवसेना राहुरी तालुका प्रमुख देवेंद्र लांबे पाटील यांनी केला आहे.

माजी मंत्री तनपुरे यांनी अलीकडेच असे म्हटले होते की, त्यांनी आणि एकनाथ शिंदे यांनी मागील सरकारमध्ये एकत्र काम केले असून दोघांमध्ये जिव्हाळ्याचे संबंध आहेत. त्यामुळे राहुरी नगरपालिकेसाठी निधी कमी पडणार नाही. या विधानाला उत्तर देताना देवेंद्र लांबे पाटील यांनी स्पष्ट केले की, जर एवढेच जिव्हाळ्याचे संबंध असतील तर माजी मंत्री तनपुरे यांनी थेट शिवसेनेच्या उमेदवारांना पाठिंबा द्यावा आणि त्यांना विजयी करावे.

“शिवसेनेचे उमेदवार निवडून आल्यास एकनाथ शिंदे यांच्या नेतृत्वाखाली राहुरी शहरासाठी मोठ्या प्रमाणात विकास निधी उपलब्ध होईल. यापूर्वीही एकनाथ शिंदे यांनी राहुरीसाठी कोट्यवधी रुपयांचा निधी दिला असून हे विरोधकही मान्य करतात,” असे लांबे पाटील म्हणाले.

नगरविकास मंत्री एकनाथ शिंदे यांच्या माध्यमातून राहुरी शहराचा सर्वांगीण विकास साधण्याच्या निर्धारातून शिवसेनेने शंभर रुपयांच्या बॉंडवर आधारित जाहीरनामा प्रसिद्ध केला आहे. या नाविन्यपूर्ण जाहीरनाम्याला राहुरी शहरातील नागरिकांकडून उत्स्फूर्त प्रतिसाद मिळत असून शिवसेनेच्या उमेदवारांबद्दल सकारात्मक वातावरण तयार झाले आहे.

राहुरी शहराचा खऱ्या अर्थाने विकास व्हावा, असे माजी मंत्री तनपुरे यांना वाटत असेल तर त्यांनी शिवसेनेचे नेतृत्व स्वीकारून पक्षात प्रवेश करावा आणि सर्व उमेदवारांना निवडून आणण्यासाठी पुढाकार घ्यावा, असे आवाहनही देवेंद्र लांबे पाटील यांनी केले.