राहुरी कृषी विद्यापीठातील शास्त्रज्ञांचे टोमॅटो पिकासाठी शेतकऱ्यांना मार्गदर्शन

राहुरी विद्यापीठ : महात्मा फुले कृषी विद्यापीठ, राहुरी येथील हॉर्टसॅप प्रकल्पांतर्गत मौजे कोठुरे (ता. निफाड, जि. नाशिक) येथे टोमॅटो पिकावरील प्रशिक्षण कार्यक्रम उत्साहात संपन्न झाला. शेतकऱ्यांचे उत्पादन वाढवणे व पिकावरील समस्यांवर शास्त्रीय उपाय सुचवणे हा या प्रशिक्षणाचा मुख्य उद्देश होता.

या कार्यक्रमात पिंपळगाव बसवंत येथील कांदा व द्राक्ष संशोधन प्रकल्पातील रोगशास्त्रज्ञ डॉ. राकेश सोनवणे, राहुरी कृषी विद्यापीठातील शास्त्रज्ञ डॉ. प्रवीण खैरे, पिंपरी (ता. निफाड) येथील मंडळ कृषी अधिकारी जनार्दन क्षीरसागर, उप कृषी अधिकारी तुळशीदास खेमनर तसेच सहायक कृषी अधिकारी योगेश पाटील उपस्थित होते.

यावेळी टोमॅटो पिकावरील कीड व रोग व्यवस्थापन, आधुनिक बाजारपेठ तंत्रज्ञान, भविष्यातील पीक पद्धती, पिकासमोर उभ्या राहणाऱ्या समस्या व त्यावरील उपाय, तसेच काढणीपश्चात तंत्रज्ञान या विषयांवर डॉ. सोनवणे आणि डॉ. खैरे यांनी शेतकऱ्यांना सविस्तर व व्यवहार्य मार्गदर्शन केले. उपस्थित शेतकऱ्यांना कीड-रोग व्यवस्थापनाबाबत माहितीपत्रकांचेही वाटप करण्यात आले.

शेती शाळेचा मागोवा घेत शेती दिनाचे महत्त्व आणि टोमॅटो पिकातील नव्या संधींबाबत जनार्दन क्षीरसागर यांनी मार्गदर्शन करत शेतकऱ्यांमध्ये नवचैतन्य निर्माण केले.

या कार्यक्रमासाठी वनस्पती रोगशास्त्र व कृषी अनुजीवशास्त्र विभागप्रमुख तसेच हॉर्टसॅप प्रकल्प प्रमुख डॉ. रवींद्र गायकवाड आणि हॉर्टसॅप प्रकल्प समन्वयक डॉ. संजय कोळसे यांचेही मार्गदर्शन लाभले. प्रशिक्षण कार्यक्रमास परिसरातील शेतकऱ्यांचा उत्स्फूर्त प्रतिसाद लाभला.