हरीगाव येथे ख्रिस्त राजा उत्सव भक्तीमय वातावरणात संपन्न

श्रीरामपूर ( बाबासाहेब चेडे ): हरीगाव येथील संत तेरेजा चर्च मतमाउली भक्तीस्थान येथे ख्रिस्त राजा उत्सव अत्यंत भक्तिभावाने आणि धार्मिक उत्साहात साजरा करण्यात आला.

उत्सवाची सुरुवात डी कॉलनीतील राजू पठारे यांच्या निवासस्थानासमोरील प्रार्थना व धार्मिक विधींनी झाली. त्यानंतर गावातील प्रमुख मार्गांवरून पवित्र साक्रामेंटची भव्य आणि शोभायात्रा काढण्यात आली. मार्गक्रमणादरम्यान पीटर जाधव व सुभाष पंडित यांच्या निवासस्थानासमोर भक्तिमय कार्यक्रम आयोजित करण्यात आला.

संत तेरेजा चर्चमध्ये झालेल्या धार्मिक सभेत रे. फा. संतान रॉड्रिग्ज यांनी ख्रिस्त राजांच्या जीवनावर प्रभावी व मनस्पर्शी प्रवचन केले. त्यांनी सांगितले की, “अनेक राजे आले व गेले, परंतु प्रभू येशू ख्रिस्ताचे राज्य हे अनंतकाळ टिकणारे आहे. तो आपल्या हृदयाचा आणि भविष्याचा राजा आहे. आपण त्याला जीवनाचा राजा केले तर जीवनातील प्रत्येक क्षण सकारात्मकतेकडे वळेल आणि आपल्या कार्यातून इतरांना आशीर्वाद लाभेल.”

“हे प्रभू येशू ख्रिस्त, तू विश्वाचा राजा आहेस, माझ्या जीवनावर तुझं राज्य नांदू दे,” अशा मनःपूर्वक प्रार्थनेने भक्तिमय मिस्साचा समारोप झाला. या पवित्र मिस्सामध्ये हरीगाव प्रमुख धर्मगुरू रे. फा. डॉमनिक रोझारिओ, फा. फ्रान्सिस ओहोळ यांसह मोठ्या संख्येने भाविक उपस्थित होते. उत्सवामुळे संपूर्ण गावात आध्यात्मिक आणि शांततेचे वातावरण निर्माण झाले होते.