राहुरी विद्यापीठ : महात्मा फुले कृषी विद्यापीठ, राहुरी येथील संशोधन संचालनालयात कार्यरत असलेले मृदा शास्त्रज्ञ प्रा. संजय तोडमल यांना वसंतराव नाईक मराठवाडा कृषि विद्यापीठाच्या 24 व्या पदवीदान समारंभात सुवर्ण पदक देऊन सन्मानित करण्यात आले.
प्रा. संजय तोडमल यांनी मराठवाडा कृषी विद्यापीठात आचार्य पदवीसाठी प्रबंध सादर केला होता. खोल जमिनीत हळुवारपणे व नियंत्रितपणे उपलब्ध होणाऱ्या खतांना सोयाबीन पिकाचा प्रतीसाद या महत्त्वपूर्ण संशोधनासाठी प्रति कुलपती दादाजी भुसे यांच्या हस्ते प्रा. संजय तोडमल यांना आचार्य पदवी प्रदान करण्यात आली. यावेळी विद्यापीठाचे कुलपती तथा राज्यपाल भगतसिंह कोशारी हे या कार्यक्रमाच्या अध्यक्षस्थानी होते. याप्रसंगी वसंतराव नाईक मराठवाडा कृषि विद्यापीठाचे कुलगुरू डॉ. अशोक ढवण, महात्मा फुले कृषी विद्यापीठ, राहुरीचे कुलगुरू डॉ. पी.जी. पाटील उपस्थित होते. यावेळी प्रा. संजय तोडमल यांना मृद विज्ञान व कृषी रसायनशास्त्र या विषयात आचार्य पदवी घेताना संपूर्ण विद्यापीठात सर्वाधिक गुण प्राप्त केल्याबद्दल सुवर्णपदक स्वर्गीय गंगाराम भागवतराव रुद्राक्ष हा पुरस्कार व रोख रकमेचा धनादेश देऊन गौरविण्यात आले.
प्रा. तोडमल यांनी सोयाबीन या पिकाला हळुवारपणे व नियंत्रितपणे उपलब्ध होणाऱ्या खतांचा प्रतिसाद, खत कार्यक्षमता, जमिनीतील अन्नद्रव्यांचे संतुलन, या खतांचा जमिनीतील जैवविविधतेवर होणारा परिणाम या बाबींचा अभ्यास त्यांनी त्यांच्या संशोधनात केला. या खतांच्या वापरामुळे सोयाबीनच्या उत्पादनात वीस टक्के वाढ आढळून आली. याचबरोबर खत कार्यक्षमता वाढलेली दिसून आली. जमिनीतील अन्नद्रव्यांचा ताळेबंद व जैवविविधतेवर या खतांचा अनुकूल परिणाम दिसून आला आहे. सोयाबीन या पिकाच्या उत्पादन खर्चात बचत होऊन जमिनीच्या शाश्वत सुपीकतेसाठी ही खते उपयुक्त ठरतील असे या संशोधनात स्पष्ट झाले आहे, ही बाब शेतकऱ्यांच्या दृष्टीने महत्त्वाची आहे.
प्रा. तोडमल यांना या संशोधनासाठी प्रमुख मार्गदर्शक म्हणून महाराष्ट्र कृषी शिक्षण व संशोधन परिषद, पुणे येथील संशोधन संचालक डॉ. हरिहर कौसडीकर यांचे मार्गदर्शन लाभले. प्रा. तोडमल यांच्या यशाबद्दल संशोधन व विस्‍तार शिक्षण संचालक डॉ. शरद गडाख, अधिष्ठाता डॉ. प्रमोद रसाळ, मृद विज्ञान व कृषी रसायनशास्त्र विभाग प्रमुख डॉ. बापूसाहेब भाकरे यांनी अभिनंदन केले आहे.
1 टिप्पण्या
अभिनंदन डॉ. संजय तोडमल.
उत्तर द्याहटवा