सौ. रिमाताई गोसावी यांना ‘नारी शक्ती’ राज्यस्तरीय पुरस्कार जाहीर; रविवारी आदर्श महिलांचा गौरव सोहळा

श्रीरामपूर | बाबासाहेब चेडे : जागतिक महिला दिनाचे औचित्य साधत विश्वलक्ष्मी ग्रामीण प्रतिष्ठान यांच्या वतीने रविवार दि. ८ मार्च २०२६ रोजी ५० आदर्श महिलांचा भव्य सन्मान सोहळा आयोजित करण्यात आला आहे. या सोहळ्यात विविध क्षेत्रांत उल्लेखनीय कार्य करणाऱ्या महिलांचा गौरव करण्यात येणार असून, सौ. रिमाताई रमेश गोसावी यांना स्व. सौ. पुष्पा सुखदेव सुकळे स्मृती राज्यस्तरीय ‘स्त्री-नारीशक्ती’ पुरस्कार प्रदान करण्यात येणार असल्याची माहिती प्रतिष्ठानचे संस्थापक सचिव सुखदेव सुकळे यांनी दिली.

हा प्रेरणादायी कार्यक्रम रविवारी सकाळी १०:०० वाजता मेनरोडवरील लोकमान्य टिळक वाचनालय यांच्या आगाशे सभागृहात संपन्न होणार आहे. कार्यक्रमाच्या प्रमुख पाहुण्या म्हणून बेलापूर येथील कला व वाणिज्य महाविद्यालयाच्या प्राचार्या डॉ. गुंफाताई कोकाटे उपस्थित राहणार आहेत. अध्यक्षस्थानी ॲड. रावसाहेब शिंदे प्रतिष्ठान चे चेअरमन तथा माजी प्राचार्य टी. ई. शेळके हे राहणार आहेत. तसेच प्रमुख उपस्थिती म्हणून प्रतिष्ठानचे अध्यक्ष डॉ. राजीव रावसाहेब शिंदे उपस्थित राहणार आहेत.

समाजातील विविध क्षेत्रांत कर्तृत्व गाजवणाऱ्या महिलांचा सन्मान करून त्यांच्या कार्याला प्रेरणा देण्याचा या उपक्रमामागील उद्देश असल्याचे आयोजकांनी स्पष्ट केले. या सोहळ्यास नागरिकांनी मोठ्या संख्येने उपस्थित राहावे, असे आवाहन संस्थापक सचिव सुखदेव सुकळे, उपाध्यक्ष व समन्वयक डॉ. बाबुराव उपाध्ये आणि खजिनदार सुयोग बुरकुले यांनी केले आहे.