राहुरी विद्यापीठ : महात्मा फुले कृषि विद्यापीठाच्या अन्नशास्त्र व तंत्रज्ञान विभागात आवळा फळ प्रक्रिया प्रशिक्षण कार्यक्रमाचे भव्य उद्घाटन विभाग प्रमुख डॉ. विक्रम कड यांच्या हस्ते संपन्न झाले. यावेळी डॉ. बाबासाहेब भिटे, कृषि सहाय्यक राहुल घुगे तसेच विभागातील कर्मचारी उपस्थित होते.
उद्घाटन प्रसंगी मार्गदर्शन करताना डॉ. कड म्हणाले की, “आवळ्यात प्रचंड पोषक घटक असून त्यापासून तयार होणाऱ्या विविध पदार्थांना बाजारपेठेत मोठी मागणी आहे. प्रशिक्षणार्थींना या माध्यमातून उद्योग स्थापन करण्यासाठी आवश्यक कौशल्य आत्मसात करता येईल.”
या प्रशिक्षणात सहभागी 16 प्रशिक्षणार्थींना आवळा कॅन्डी, आवळा गर साठवणे, आवळा लोणचे, आवळा सरबत, सुपारी, मुरंबा, सिरप तसेच आवळा पावडर इत्यादी पदार्थांच्या निर्मितीचे प्रत्यक्ष प्रशिक्षण दिले जाणार आहे. त्याचबरोबर अन्न सुरक्षा व मानके, प्रक्रिया उद्योगासाठी कायदे, उद्योग नोंदणी प्रक्रिया, आवश्यक उपकरणे व त्यांची देखभाल, पॅकेजिंग व मार्केटिंग तसेच शासनाच्या कर्ज–अनुदान योजनांची माहिती देखील सहभागींसाठी उपयुक्त ठरणार आहे.
कार्यक्रमाचे प्रास्ताविक डॉ. बाबासाहेब भिटे यांनी केले. सूत्रसंचालन राहुल घुगे यांनी तर आभारप्रदर्शन गोरक्षनाथ चौधरी यांनी केले. मुंबई, पुणे, सातारा, अहिल्यानगर, जालना आणि नंदुरबार जिल्ह्यातून प्रशिक्षणार्थी सहभागी झाले आहेत. या प्रशिक्षणाच्या यशस्वीतेसाठी पोपट खर्से, सौ. सविता धनवडे आणि सुभाष माने यांचे विशेष योगदान राहणार आहे.
0 टिप्पण्या