राहुरी / बाळकृष्ण भोसले - चिंचोलीतलं सोसायटीचं इलेक्शन बिनविरोध झालं खरं मात्र रस्सीखेच झाल्यागत दोन्ही गट अद्याप दुभंगलेलेच असल्याचं महिना झाला पणं हे चित्र स्पष्टपणे दिसत आहे. गावच्या एकोप्याच्या परंपरेला यानिमित्ताने सुरुंग लागल्याचे जाणवत आहे.
निमित्त होते खासदार संभाजीराजे छत्रपतींच्या स्वागताचे... खासदार संभाजीराजे आपला नाशिक दौरा आटोपून अहमदनगरच्या बैठकीला जात असताना चिंचोलीचे सरपंच गणेश हारदे यांच्या विनंतीवरून चिंचोलीत स्वागत समारंभासाठी काही क्षण थांबण्यासाठी तयार झाले. हा पक्षीय कार्यक्रम नव्हताच मुळी. छत्रपती घराण्याचे वारसदार चिंचोलीत येणार म्हणून खरतर गावची तमाम मंडळी एकत्र येत जल्लोषात स्वागत करणे अपेक्षित होते. मात्र येथेही राजकीय वास आला. एकाचं गटाचे कार्यकर्ते नगर-मनमाड महामार्गावर दिसले तसं स्वागत जल्लोषात झालं... पणं आपापले राजकीय हेवेदावे आपल्या घरातचं ठेवून पाहुण्यांच्या स्वागताला सर्वजण एक होवून आम्ही एकत्रचं आहोत हा अपेक्षित संदेश मात्र गावातून दिसला गेला नसल्याचं यानिमित्ताने अधोरेखित झालं. वैचारिक नागरिक स्वयंस्फूर्तीने आले, मात्र नेते चिखलातचं रुतून बसल्याचे वास्तव पुढे आले.
एकाच मतदार संघात आमनेसामने लढणारे पक्षीय लोकप्रतिनिधी पंचायत समितीपासून मंत्रालयापर्यंत मांडीला मांडी लावून बसत सत्ताधाऱ्यांकडून आपापली कामे करून घेतात. मात्र गावखेड्यातील नेते मात्र आयुष्यभराचे विरोधक म्हणून जगतात. हे आजच्या काळातील चित्र खरचं बदलण्याची गरज आहे. तरच येणाऱ्या पिढीला आपण काही आदर्शवत देवू शकलो हे म्हणता येईल.
ता.क.
गत रविवारच्या 'कुजबूज' सदराविषयी गावातून व बाहेरुन अनेकांनी छान प्रतिक्रिया दिल्या. गाव एकोपा व गाव विकासासाठी सुरू केलेल्या या सदरातून अनोखा संदेश देत असल्याबद्दल अनेकांनी आभार ही व्यक्त केलेत. या सर्वांचे अभिनंदन... या सदरातून मन दुखावण्याचा नाही तर मन जोडण्याचा आमचा प्रयत्न आहे तो निरंतर सुरुच राहणार आहे.
0 टिप्पण्या