राहुरी विद्यापीठ : कोंढवड व शिलेगाव येथील खपली गहू शेतकरी-शास्त्रज्ञ मंचाच्या शेतकर्यांनी गटाद्वारे केलेला 600 एकराच्यावर खपली गहू लागवडीचा उपक्रम हा स्तुत्य आहे. या शेतकर्यांच्या मागणीनुसार आपण आजचा हा प्रशिक्षण कार्यक्रम आयोजीत केलेला आहे. खपली गव्हामध्ये कोंढवडचे नाव राज्यात घेतले जात आहे. येथील खपली गव्हाच्या जी.आय. मानांकनासाठी कृषि विभागामार्फत प्रयत्न करावेत. शेतकर्यांनी असे नाविन्यपूर्ण उपक्रम हाती घेतले तर विद्यापीठ सदैव त्यांना मार्गदर्शन करण्यासाठी सज्य राहील. शेतकर्यांनी नुसते खपली गव्हाचे उत्पादन न घेता त्याचे मुल्यवर्धन करावे व अधिकचा फायदा घ्यावा असे प्रतिपादन महात्मा फुले कृषि विद्यापीठाचे विस्तार शिक्षण संचालक डॉ. गोरक्ष ससाणे यांनी केले.
कुलगुरु डॉ. शरद गडाख यांच्या मार्गदर्शनाखाली महात्मा फुले कृषि विद्यापीठ, राहुरी येथील विस्तार शिक्षण संचालनालयांतर्गत असलेले कृषि तंत्रज्ञान माहिती केंद्र व कृषि विभाग, महाराष्ट्र शासन यांच्या संयुक्त विद्यमाने खपली गहू लागवड तंत्रज्ञान या विषयावर कोंढवड येथील खपली गहू शेतकरी शास्त्रज्ञ-मंचाच्या सदस्यांसाठी शेतकरी प्रशिक्षण कार्यक्रमाचे आयोजन करण्यात आले होते. या कार्यक्रमाच्या अध्यक्षस्थानावरुन डॉ. गोरक्ष ससाणे बोलत होते. यावेळी कृषि तंत्रज्ञान शिक्षणाचे सहयोगी अधिष्ठाता डॉ. प्रशांत बोडके, कडधान्य सुधार प्रकल्पाचे प्रमुख शास्त्रज्ञ डॉ. सुरेश दोडके, कृषि तंत्रज्ञान माहिती केंद्राचे व्यवस्थापक डॉ. आनंद चवई, तालुका कृषि अधिकारी बापुसाहेब शिंदे, शिलेगावचे सरपंच डॉ. पांडुरंग म्हसे उपस्थित होते.
यावेळी मार्गदर्शन करतांना डॉ. प्रशांत बोडके म्हणाले कोणतेही पीक घेतांना शेतकर्यांनी विद्यापीठाच्या तंत्रज्ञान शिफारशींचा अवलंब करावा. विद्यापीठाने विकसीत केलेले वाण, जैविक किटकनाशके, जैविक खते, सूक्ष्म अन्नदव्ये हे दर्जेदार असल्याने त्यांचा वापर करावा. शेतकर्यांनी आपल्या शेतीवर काही प्रमाणात सेंद्रिय उत्पादन घ्यावे, यासाठी विद्यापीठ मार्गदर्शनासाठी सदैव तयार आहे. यावेळी डॉ. सुरेश दोडके यांनी खपली गहू लागवड तंत्रज्ञान, बापुसाहेब शिंदे यांनी शासनाच्या विविध कृषि योजना व महाविस्तार ए.आय. ॲप, डॉ. विवेक शिंदे यांनी खपली गहू रोग व्यवस्थापन, डॉ. धनश्री सरनोबत यांनी फुले सुपर बायोमिक्सचा वापर, डॉ. शितल ताटपुरकर यांनी फुले सूक्ष्म अन्नद्रव्य ग्रेड-2 चा वापर, डॉ. बाबासाहेब भिटे यांनी खपली गहू काढणी पश्चात तंत्रज्ञान आणि डॉ. योगेश बन यांनी भरडधान्याची लागवड व त्याचे आहारातील महत्व या विषयांवर मार्गदर्शन केले.
कार्यक्रमाचे प्रस्ताविक डॉ. आनंद चवई यांनी केले. याप्रसंगी विद्यापीठाचे माजी शास्त्रज्ञ डॉ. श्रीकांत कुलकर्णी, अर्जुन म्हसे, डॉ. पांडुरंग म्हसे यांनी आपले मनोगत व्यक्त केले. कार्यक्रमाचे सूत्रसंचालन कृषि तंत्रज्ञान माहिती केंद्राचे डॉ. सुनिल अडांगळे यांनी तर आभार डॉ. अन्सारखान अत्तार यांनी मानले.
0 टिप्पण्या