चिंचोलीचा गाव विकास 'मनातून बरोबर मनापासून'

बाळकृष्ण भोसले

राहुरी -  तालुक्यातील चिंचोली गाव राजकीय दृष्टीने नेहमीच विखुरलेले पहावयास मिळते. मात्र सामाजिक दृष्ट्या विविध विकासात्मक पैलूंसाठी फार पूर्वीपासून एकसंघ राहिल्याचे गावच्या एकुणच ईतिहासात आवर्जुन नमूद झाल्याचे पहावयास मिळते, तोच कित्ता सध्याची ग्रामपंचायतीची सत्ताधारी तरुणाई गिरविताना दिसत आहे.

सर्वसमावेशकतेने विकासकामे केली तर ती जनतेला नक्किच भावतात व काळजात घर करुन राहतात. त्यानुषंगाने ग्रामपंचायतीत पदाधिकारी व प्रशासन दोन्हीनी हातात हात घालुन एकत्रित कामे केल्यास त्या कामाचा दर्जा व पारदर्शकता दोन्हिंचा मेळ बसुन गावकर्याचा विश्वास संपादित करता येतो हा मेळ काही अंशी बसला म्हणून गत चार, साडे चार वर्षे अनेक कामे पूर्ण करता आली. बहुतांशी कामात प्रशासनाकडून 'खो' घातला गेला ही वस्तुस्थिती असली तरी सरपंच, उपसरपंच व पदाधिकारी खंबीर राहिल्याने मोठा काही परिणाम जाणवला नाही.

यंदा प्रशासनात फेरबदल झाल्याने सुयोग्य अधिकारी पंचायतीत आला तर राहिलेली कामे पदाधिकारी व प्रशासनाच्या माध्यमातून निश्चितपणे पार केली जातील यात शंका नाही. हळुहळू चिंचोलीचा गावगाडा मनमतांतर बाजुला ठेवत एकमेकात संवाद साधताना दिसत आहेत. ही जमेची बाजू म्हणता येईल. नुकताच आमदार लहू कानडे यांचा चिंचोलीत महसूल भवन भूमिपूजनच्या निमित्ताने दौरा झाला यावेळी त्यांनी ग्रामपंचायतीतच अधिकारी, पदाधिकारी यांची आढावा बैठक घेत मतदारसंघातील विविध प्रश्नांचा मागोवा घेतला. प्रशासकिय कामाचा आ. कानडे यांना पुर्वापार  अनुभव असल्याने त्यांनी काही प्रश्नी जागेवरच मार्ग काढला. मात्र या राजकारण विरहित शासकीय  कार्यक्रमाला स्थानिक राजकारण आडवे आले व  गटतट पहावयास मिळाले या गटातटाच्य राजकारणाने  अनेक गावांचा विकास खोळंबला असल्याचे नेहमीच दिसते तीच प्रचिती या कार्यक्रमात दिसली  किमान या कार्यक्रमात तरी एकत्र येण्याची अपेक्षा ग्रामस्थांनी व्यक्त केली ती फोल ठरली. तरुणाई मात्र एकदिलाने काम करताना व प्रत्येक कार्यक्रमात एकत्र येतात ही जमेची बाजू म्हणता येईल.

एकुणच गावगाडा सक्षमपणे पुढे नेण्यासाठी आज तरुणामधुन जागृती होते आहे. चिंचोलीत त्या अनुषंगाने प्रयत्न होतायत ही सामाजिक प्रवाह नितळ होण्याचा मार्ग असल्याचं प्रतिक आहे नि ते निश्चितचं स्वागतार्ह  आहे या दिशेनं पडत असलेली पावलं प्रगतीपथाकडे नेण्यासाठी अनुकूल असल्याची जाणीव देतात.

 ****

 'कुजबूज' 

सदर गेली दोन आठवडे आपणापुढे सादर करता आले नाही. त्याबद्दल प्रथमतः आम्ही दिलगीर आहोत. यापुढे गावगाड्यात घडत असलेल्या दैनंदिन घडामोडीची ठळक नोंद 'क्रांतीनामा' च्या माध्यमातून आपणापुढे आणण्याचा प्रयत्न नक्कीच असणार आहे. अनेकांनी फोन करत अथवा प्रत्यक्ष भेटून कुजबूज या सदराविषयी आस्थेवाईक चौकशी केली. त्या सर्वांचे आभार नि यापुढेही नक्कीच आपले अभिप्राय असेच देत राहावेत हिच अपेक्षा.