चिंचोलीचा गावगाडा येतोय रुळावर...

बाळकृष्ण भोसले

राहुरी - गेल्या चार आठवड्यापासून चिंचोलीतील प्रामुख्याने निवडणूकीनंतर 'नेत्यांची मन दुभंगलेलीच' या विषयावर सविस्तर चर्चा झाली. अनेकांनी याचे स्वागत केले. यावर आणखी लिहीण्यासाठी प्रोत्साहित केलं व गावखेडी का मागे राहतात याची खासगीत कारणमिमांसा करत नेहमी दुर्लक्षित राहिलेला प्रश्न हाती घेत चांगलं ते चांगलं व वाईट ते वाईट मांडण्याचं धाडसं दाखवलं म्हणून 'क्रांतीनामा' च्या कुजबूज सदराला धन्यवादही दिले.

याऊलट काही स्वयंभू नेत्यांनी नाराजीही व्यक्त केली. कारण त्यांच्या दुखऱ्या नसेवर क्रांतीनामाने दाब देतं परखड मत व्यक्त केलं. त्यामुळे त्यांनी दु:खी होण आम्ही समजू शकतो. पणं गावगाडा पुढे नेण्यासाठी आम्ही नक्कीच अशा दुखऱ्या नसा शोधून त्यावर निरंतर परखड मत मांडणार हे निश्चित.., एरवी मतांसाठी येनकेन प्रकार शोधणारे हे स्वयंभू नेते गावगाड्याला पुढे नेण्याऐवजी आपलं स्थान कसं मोठं आहे हे दाखवण्यात धन्यता मानतात. हे शोभनीय आहे का? असाही प्रश्न जनतेतून विचारला जाणं साहजिकच आहे. तर असो आमच्या या प्रक्रियेने होतोय तो फरक जाणवतोय. हळूहळू नेते वगळता ग्रामस्थ एकत्रितपणे चर्चा करताना दिसतात हे स्वागतार्हच आहेे. प्रश्न खूप आहेत पणं उत्तरं कमी असले तरी विकासात्मक मार्गाने पुढे जाणाऱ्याच्या मागे जनता असते याची प्रचिती पावलोपावली राजकीय स्थित्यंतरावरुन नेहमी पुढे येत असल्याची उदाहरणे बरीच आहेत.

चिंचोलीतही अशा व्यक्ती आहेत म्हणून सत्ताधारी, विरोधकांवर अंकूश ठेवणं सहज शक्य होत आहे, नाही म्हणायला ग्रामपंचायतीच्या माध्यमातून बरीच विकासात्मक कामे झालीत, बरीच राहिलीत. पण जी झालीत ती स्विकारायलाही मनाचा मोठेपणा दाखवावा लागतो. कारण गावं आपलचं आहे नि गावासाठी कामे करणारी माणसेही आपलीच आहेत. आज ते आहेत उद्या आपणं तेथे जाणार आहोत. याचाही प्रकर्षाने विचार होणं गरजेचं आहे.

जाता-जाता दुभंगलेली मनं हळूहळू जोडली जातीलही तो प्रयत्न प्रत्येक जाणकार घटकाकडून आता होतो आहे. पणं फक्त टोकदार विरोध करुन आपणं कायं मिळवलं याचीही मनोमनी सांगोपांग चर्चा होणं अपेक्षित आहे. मनमुटाव दूर करण्यासाठी स्थानिक ह.भ.प. मंडळी पुढे येत आहे हेही नसे थोडके... तुर्तास एवढेच पुढील भागात आणखी एका चर्चेतल्या विषयावर नक्की मांडणी करु.