राहुरी / बाळकृष्ण भोसले - तालुक्यातील चिंचोली गावं, पुर्वापार एकसंघ असल्याची हाळी देणारं, वरिष्ठ नेते जरी दलबदलू झाले तरी गावचं गावपणं टिकविण्याचा वसा घेतलेलं निवडणूकीपुरते वेगळे झाले तरी नंतर एकदिलाने एकत्र काम करण्याची ख्याती असल्याचे पुरावे देणारं गावखेड म्हणूनच विकासाच्या उंबरठ्यावर आलेलं व तालुक्याच्या नकाशात विकासात्मक दुरदृष्टी ठळकपणे नमूद करणारं गावं... मात्र कोण जाणे काय झालं? शरीराने जवळ पण मनाने एकमेकांपासून विभक्त होत असल्याची जाणीव देत आहे. काळाच्या ओघात गावातील जुनेजाणते गावकारभारी गेले नि सक्षमपणे गावची धुरा सांभाळण्यात व गावचं गावपणं टिकवून ठेवण्यात म्हणावे तशी पावलं टाकण्यात अपयश आल्याची भावना गावातून उमटत आहे.
सोसायटी बिनविरोध होवूनही एकमेकात फांगळा झाल्याचं वास्तव आज गाव पाहात आहे. विखे पाटील गटातच दोन गट, पणं आता कट्टर विरोधक म्हणून उदयास आलेलं स्पष्ट चित्र पहावयास मिळत आहे. ग्रामपंचायतीत एकदिलाने काम पाहणारे दोन्ही गट आता खास विरोधक झालेत, वर्षाखेरीस आलेली ग्रामपंचायत निवडणूक स्पर्धात्मक होण्याची चिन्हे सध्याच दोन्ही गटात दिसत आहेत. पंचायतीत सरपंच, उपसरपंच या जोडगोळी तरुणाईने एकदिलाने कामे करून गावातील सबंध वाड्यावस्त्यांवरील कच्चे रस्ते खडीकरण करुन मजबूत केले. पर्यायाने शिवार वाहतूकीचा ग्रामस्थांचा महत्त्वाचा प्रश्न मिटला खरा पणं सोसायटी निवडणूकीनंतर ग्रामपंचायत पदाधिकाऱ्यात मनांतर पडले. त्याचा फटका राहिलेल्या पाच सात महिन्याच्या उत्तरार्धातील जलजीवन मिशन, सौर प्रकल्प, आदिंसारख्या विकासकामावर होवू नये अशीच अपेक्षा नागरीकांमधून व्यक्त होत आहे. तुर्तास एवढेच उर्वरीत पुढील भागात...
रविवारच्या कुजबूज सदराविषयी गावातील सर्वच थरातून अपेक्षित प्रतिक्रिया मिळत आहे. यातून चांगला संदेश जात असल्याची बोलकी प्रतिक्रिया सर्जेराव लाटे यांचेसह अनेकांनी व्यक्त केली. या सदरातून मनोमिलनाचा व एकसंघपणे गावगाडा पुढे नेण्यासाठी प्रोत्साहित करण्याचा आमचा प्रयत्न आहे. कुणाचं काही दुखावण्याचा उद्देश नक्कीच नाही.
0 टिप्पण्या