आय कॉलेज मध्ये प्रवेश घेतलेल्या सर्व विद्यार्थ्यांचे या कॉलेज कट्टा मध्ये सहर्ष स्वागत. आपण महाविद्यालया मध्ये प्रवेश घेतला याबद्दल मी प्राचार्य या नात्याने तसेच माझ्या सर्व शिक्षक व शिक्षकेतर कर्मचाऱ्यांच्या वतीने आपले मनःपूर्वक स्वागत करतो.
मित्रहो आपले कॉलेज हे केवळ कॉलेज नाही, हे केवळ महाविद्यालय नाही, तर हे आयुष्याला वळण देणारे तरुण-तरुणींना अष्टावधानी करणारे आणि अर्थातच आपल्या व्यक्तिमत्त्वाला चांगला साज चढवणारे महाविद्यालय आहे. आपले महाविद्यालय इंदापूर तालुका शिक्षण प्रसारक मंडळाद्वारे चालविले जाते. इंदापूर तालुका शिक्षण प्रसारक मंडळाचे अध्यक्ष मा. हर्षवर्धनजी पाटील साहेब (माजी संसदीय कार्यमंत्री, महाराष्ट्र राज्य) आहेत. तसेच ते याच महाविद्यालयाचे माजी विद्यार्थी देखील आहेत. महाविद्यालयीन विद्यार्थ्यांचा व्यक्तिमत्त्व विकास व्हावा व विद्यार्थ्यांनी विविध अंगांनी परिपूर्ण व्हावे यासाठी सतत ते सांगत असतात.
मित्रहो तुमच्यापैकी काही जणांना कदाचित आय कॉलेज म्हणजे काय हे माहीत नसेल. मी मघाशी म्हणलो की, आय कॉलेज हे केवळ महाविद्यालय नाही, ही एक वृत्ती आहे आणि ही वृत्ती काय आहे? हे आपण समजून घेतले पाहिजे. आपले कला, विज्ञान आणि वाणिज्य महाविद्यालय आहे. कला शाखेमध्ये अनेक विषय आपल्याकडे शिकविले जातात, विज्ञान शाखेमध्ये तर आपल्याकडे पी. एचडी पर्यंत सेंटर तयार झालेले आहेत, आणि वाणिज्य शाखा सुद्धा आपली संपूर्णपणे विकसित झालेली आहे. या व्यतिरिक्त आपल्याकडे BBA(CA), B.Voc हे कोर्स सुद्धा चालू आहेत. आता तुम्हाला प्रश्न पडला असेल की आय कॉलेज म्हणजे काय?
वास्तविक
i म्हणजे inspiration,
i म्हणजे innovation,
i म्हणजे indigenous,
i म्हणजे imagination,
i म्हणजे intelligence,
i म्हणजे indapur,
i म्हणजे मी
मी म्हणजे माझं,
i(eye) म्हणजे डोळा, डोळा अर्थात दृष्टी
म्हणजेच दृष्टिकोन देणारं महाविद्यालय म्हणजेच आय कॉलेज.
आपल्या महाविद्यालयांमध्ये गेल्या दहा वर्षात अनेक नाविन्यपूर्ण उपक्रम राबविले गेले आणि म्हणूनच आपलं महाविद्यालय हे वैशिष्ट्यपूर्ण आहे, उपक्रमशील आहे, धडपडणार आहे. आपण अनंत प्रयोग नव्याने राबवीत असतो आणि म्हणूनच सृजनशील उपक्रम राबविणारे, इनोव्हेटिव्ह प्रयोग राबविणारे असे अनेक पुरस्कार आपल्या महाविद्यालयास मिळालेले आहेत. नुकताच आपल्या महाविद्यालयाच्या फ्लेमिंगो या नियत कालिकाला सावित्रीबाई फुले पुणे विद्यापीठाचा प्रथम क्रमांकाचा पुरस्कार प्राप्त झाला.
सन 2013 साली आपल्या महाविद्यालयाला राष्ट्रीय सेवा योजनेचा राष्ट्रीय पुरस्कार राष्ट्रपतींच्या हस्ते मिळालेला आहे. आपलं महाविद्यालय उत्कृष्ठ महाविद्यालय म्हणून गणले जाते. आपल्या महाविद्यालयाला उत्कृष्ट प्राचार्य, उत्कृष्ट प्राध्यापक, उत्कृष्ट विद्यार्थी याबरोबरच सहा सुवर्णपदके मिळालेली आहेत.
तुमच्या लक्षात येईल की, केवळ वर्गात शिकवले जाणाऱ्या शिक्षणाला आपल्याकडे महत्त्व दिले जात नाही. तर त्याच्या बरोबरीने जे घडतं ज्याला जीवनाचा सार म्हणता येईल असे अभ्यासपूरक अभ्यासेतर आणि एक्सटेंशन ऍक्टिव्हिटी यावर भर दिला जातो.
अर्थात कला, क्रीडा, साहित्य, अवांतर या सगळ्या प्रकारांना आपण कमालीचं महत्त्व देतो आणि म्हणूनच ज्याला जे वाटतं त्यांनी ते कराव या उक्तीप्रमाणे जो ज्यामध्ये चांगला आहे त्यांनी त्यामध्ये महत्त्व द्यायचं. तुम्ही जर पाहिलं तर नवीन शैक्षणिक धोरणामध्ये यालाच महत्त्व प्राप्त झालेले आहे. म्हणूनच आपल्याला ज्यामध्ये रस आहे, ज्यामध्ये गती आहे त्यामध्ये आपण पुढे गेले पाहिजे.
मित्रहो, आज पासून या कॉलेज कट्ट्याची मालिका आपण सुरू करतो आहोत. पूर्वी मी प्राचार्यांचे अभिभाषण प्रथम वर्षाच्या विद्यार्थ्यांना देत असे, परंतु त्यासाठी अनेक विद्यार्थी गैरहजर असत किंवा त्या वेळेत त्या विद्यार्थ्यांना जमत नसे. आणि म्हणूनच या वर्षापासून ही प्राचार्यांच्या अभिभाषणाची लेखमालिका सुरू करण्याचा निर्णय मी घेतला आहे.
तुम्ही याला प्राचार्यांचा कट्टा म्हणा, माझे मनोगत म्हणा, माझी मन की बात म्हणा, तुमच्याशी साधलेला सुसंवाद म्हणा म्हणजेच विद्यार्थ्यांशी सुसंवाद अर्थात हे एकतर्फी मनोगत वाटेल पण ते तसे नाही. कारण रोज आलेले अनुभव, गेल्या दहा वर्षात प्रशासक म्हणून, प्राध्यापक म्हणून, प्राचार्य म्हणून मला अनुभवायला मिळालेल्या अनुभवांची शिदोरी आहे. तसे हे आनंदाचे डोही आनंद तरंग आहे. त्यामुळे आपण या आनंदाचे रस ग्रहण कराल याची मला खात्री वाटते. आपण या यज्ञामध्ये सहभागी होऊयात आणि आपल्याही समिधा या यज्ञामध्ये मिळवूया. मी अनंत विषयांवर लिहिणार आहे, बोलणार आहे. हे विषय केवळ शाळाबाह्य शिक्षण असं नाही. शाळेतले शिक्षण म्हणजेच महाविद्यालय असेही नाही, आपले शिक्षण, राष्ट्रीय सेवा योजना, राष्ट्रीय छात्र सेना, क्रीडा विभाग, आविष्कार, साहित्य, साहित्य निर्मिती, सर्जनशीलता, वक्तृत्व, आपला विषय आणि समाजसेवा, आई-वडिलांशी आपलं वागणं अशा अनंत विषयांवर मी बोलणार आहे. यामधून व्यक्तिमत्व विकास होण्यासाठी तुम्हाला मदत होईल याची मला खात्री आहे.
आपण रोज एका नवीन विषयावरती चर्चा करणार आहोत.
चला लिहिते होऊया
व्यक्त व्हा, मोकळे व्हा, प्रचंड वाचा, लिहा आपले मनोगत लिहा.
धन्यवाद आणि आपणास शुभेच्छा.
ज्ञानसुत डॉ. संजय चाकणे
प्राचार्य : कला, विज्ञान आणि वाणिज्य महाविद्यालय इंदापूर,
सदस्य : अधिसभा, विद्वत सभा, परीक्षा विभाग, व्यवस्थापन परिषद, सावित्रीबाई फुले पुणे विद्यापीठ, पुणे.
क्रमशः
1 टिप्पण्या
नाइस
उत्तर द्याहटवा