बाळकृष्ण भोसले/ राहुरी : कोरोना महामारीत अनेकांचे रोजगार गेले, मजूरांच्या हातालाही काम नाही, बरोबरच वाढलेल्या महागाईचा डोंगर यासारख्या असंख्य संकटाचा सामना निम्न मध्यमवर्गीय, शेतकरी तसेच मजूरांवर आल्याने यातून आलेले नैराश्य याचा गैरफायदा काही महाभाग घेत ग्रामीण भागातून काळ्या जादूचे प्रकार अनेक ठिकाणी लपूनछपून रात्री - अपरात्री घडत असल्याचे वास्तव आहेे. याबाबत कमालीची गुप्तता पाळण्यात येत असली तरी मात्र हे गुपित दिवसा रस्त्या- रस्त्यावरुन टाकलेल्या वस्तूंवरून उघड होत आहे.
कोरोना महामारीत अनेकविध संकटाचा सामना करत - करत ग्रामीण भागातील जनजीवन अजूनही पुर्वपदावर आलेले दिसत नाही. मग त्यात शेतकरी, शेतमजूर याबरोबरच बेरोजगारांचे आर्थिक कंबरडे मोडले आहे. यातून मोठ्या प्रमाणात नैराश्य आल्याचे एकंदरीत मनोविकार तज्ञांच्या दवाखान्यातील गर्दीवरुन सहज लक्षात येते. दिवसेंदिवस वाढत असलेली महागाई, त्याप्रमाणात घटत असलेला रोजगार व तुटपुंजी कमाई ही कारणे प्रामुख्याने समोर आली आहेत. त्यात ग्रामीण भागातील समाज सामुहिकपणे राहणारा व चटकन कोणत्याही गोष्टीवर विश्वास ठेवणारा याचाच गैरफायदा घेणारे अनेक महाभाग पावलोपावली असतात. कमी श्रमात अधिक कमावणारी ही जमात अशा लोकांच्या शोधातच असते. जनतेसमोर आपल्याच माणसाला चमत्कार घडल्याचे भासवून या देवभोळ्या जनतेचा विश्वास संपादन करत त्यांना लुटण्याचे तंत्र यांनी आत्मसात केलेलं असते. ग्रामीण जनता लवकर यांच्या जाळ्यात अडकते.
असेच प्रकार सध्या ग्रामीण भागातील अनेक रस्त्यावर दिसत आहेत. हळद, कुंकू, काळी बाहुली, लिंबू, नारळ, टाचण्या आदी वस्तूंचा खच रस्तोरस्ती दिसून येत आहे तर गावागावातून अंगात येण्याचे प्रकारही वाढले आहेत. खासकरुन महिला वर्गातून अंगात येण्याचे प्रमाण खूप वाढल्याचे चित्र सध्या गावागावातून होत असलेल्या पारंपरिक जागरण - गोंधळ कार्यक्रमातून पुढे आले आहे. काही दिवसापुर्वीच राहुरी कारखाना येथील उच्चभ्रु वस्तीत काळ्या जादूचा प्रकार राहुरी पोलिसांच्या सतर्कतेमुळे वेळीच हाणून पाडण्यात येवून या प्रकाराला प्रवृत्त करणारा भोंदूबाबा पोलिसांनी गजाआड केला होता. मात्र सर्रास असे प्रकार ठिकठिकाणी घडत असून मोठ्या प्रमाणात कोंबडे बकऱ्यांचे बळी दिले जात आहेत. मात्र बळी दिलेल्या या कोंबड्या बकऱ्यांचे बिल बिचाऱ्या बिबट्याच्या नावावर फाडले जात आहे. यात अडाणी समाजाबरोबर साक्षर समाजाचे प्रमाणही अधिक असल्याचे दुर्दैव आहे. अगोदरच आर्थिक कंबरडे मोडलेले वरुन उधार ऊसनवारी अथवा व्याजाने पैसे काढून या महाभागांना दिले जात असल्याने देवभोळी जनता अजून रसातळाला जाताना दिसत आहे. मुलांच्या शिक्षणासाठी काटकसर करत असलेला हा वर्ग मात्र भोंदूबाबांना मागेल तितका पैसा चटकन देत असल्याने अजून कर्जबाजारी होत आहे.
या प्रकाराला आळा घालण्यासाठी प्रशासनाबरोबरच सुशिक्षित तरुण, स्थानिक प्रशासन, व जागरूक नागरिकांवर आता मोठी जबाबदारी असून अंधश्रध्दा निर्मूलन समितीच्या कार्यकर्त्यांबरोबर सामाजिक क्षेत्रात काम करणाऱ्या तरुणांनी समाज प्रबोधन करण्याची गरज निर्माण झाली असून आपल्या आजूबाजूला घडत असलेल्या या प्रकाराविषयी प्रशासनाला सतर्क करण्याची तसदी घेण्याची खरी गरज निर्माण झाली आहे तरच गर्तेत जात असलेला हा वर्ग या चक्रव्युहातून बाहेर पडण्यास मदत होईल.
0 टिप्पण्या