राहुरी : मानोरी ग्रामपंचायतीत बुधवारी पार पडलेल्या विशेष ग्रामसभेत थकीत घरपट्टी करदात्यांना तब्बल ५० टक्के सवलत देण्याचा ऐतिहासिक ठराव एकमुखाने मंजूर करण्यात आला. मुख्यमंत्री समृद्ध पंचायत राज अभियानांतर्गत आयोजित या सभेचे अध्यक्षस्थान सरपंच सौ. ताराबाई भिमराज वाघ यांनी भूषविले. हनुमान मंदिरासमोरील मंडपात झालेल्या या बैठकीस ग्रामस्थांची मोठ्या संख्येने उपस्थिती होती.
ग्रामविकास अधिकारी संतोष राठोड यांनी कर सवलतीसंदर्भातील शासकीय परिपत्रकातील तरतुदी स्पष्ट करताना सांगितले की, चालू वर्षाची घरपट्टी पूर्ण भरणे बंधनकारक राहील; तर मागील वर्षांच्या घरपट्टीथकबाकीवर ५० टक्के सवलत लागू राहणार आहे. मानोरी १४ गावांच्या सामूहिक पाणीपुरवठा योजनेत असल्याने पाणीपट्टीवर सवलत दिली जाणार नाही, हेही स्पष्ट करण्यात आले. या निर्णयामुळे सर्वसामान्य घरमालकांना दिलासा मिळून महसूल संकलन वाढण्यासाठी मदत होईल, असा विश्वास व्यक्त करण्यात आला.
सभेत १५वा वित्त आयोग २०२६–२७ च्या वार्षिक विकास आराखड्यावरील प्रस्तावांवर सविस्तर चर्चा झाली. रस्ते, गटारे, स्वच्छता, प्रकाशयोजना, पाणीपुरवठा सुधारणा, सार्वजनिक सुविधा यांसारख्या मूलभूत कामांना प्राधान्य देण्यात आले. दलित वस्ती सुधार योजनेसाठी तसेच मनरेगा अंतर्गत शेततळी दुरुस्ती, जलसाठा वाढ, सार्वजनिक ठिकाणांचे सौंदर्यीकरण, श्रमदान प्रोत्साहन आदी कामांना सभेची सकारात्मक मंजुरी मिळाली.
ग्रामस्थांनी मानोरीचा पाणीपुरवठा वारंवार विस्कळीत होत असल्याची तक्रार सभेत मांडली. सध्याची पाइपलाइन आरडगावमार्गे शेवटचे गाव असल्याने दाब कमी पडतो, याची दखल घेऊन मानोरीसाठी पाणीपुरवठ्याची नवी पाइपलाइन ‘केंदळ’ गावातून जोडण्याचा महत्त्वपूर्ण व दूरदृष्टीचा निर्णय सर्वानुमते मंजूर करण्यात आला. या नव्या जोडणीमुळे मानोरीला नियमित, स्थिर व पुरेशा दाबाचा पाणीपुरवठा मिळेल असा ठाम विश्वास ग्रामपंचायत पदाधिकाऱ्यांनी व्यक्त केला.
या सभेला ग्रामपंचायत सदस्य शामराव आढाव, नानासाहेब आढाव, कारभारी बर्डे, सुमन आढाव, दिलशाद पठाण, उत्तमराव खुळे, बापूसाहेब वाघ, महसूल अधिकारी सोनाली जराड, कृषी सहाय्यक सारिका हरिचंद्र, मुख्याध्यापक रविकांत सुसे, पोलीस पाटील भाऊराव आढाव तसेच अनेक ग्रामस्थ उपस्थित होते.
ग्रामविकास अधिकारी संतोष राठोड यांनी शासकीय योजनांची माहिती देत ग्रामस्थांच्या तातडीच्या प्रश्नांची समाधानकारक उत्तरे दिली. विकासकामे पारदर्शकतेने व वेळेवर पूर्ण करण्यासाठी ग्रामस्थांनी सहकार्य करावे, असे आवाहन त्यांनी केले.
अखेर सरपंच सौ. ताराबाई वाघ यांनी उपस्थितांचे आभार मानत, लोकसहभागातून ग्रामसभा यशस्वीरीत्या पार पडल्याचे सांगितले. मानोरीच्या सर्वांगीण प्रगतीसाठी ग्रामस्थ एकदिलाने काम करतील, असा विश्वासही त्यांनी व्यक्त केला.
0 टिप्पण्या