चिंचोलीचा तो आगळा वेगळा कार्यक्रम

बाळकृष्ण भोसले 

राहुरी - तीन वर्षापूर्वी संपुर्ण जगाने ती अद्भूत महामारी भोगली, अनुभवली, सोसली आपले रक्ताच्या नात्यातील नातलग, मित्र, मैत्रिणी, सगेसोयरे या भयंकर महामारीने गिळंकृत केले तर काही घरी तर चिटपाखरूही उरले नाही,  नाही म्हणायला मृतदेह उचलायला त्यावर अंत्यसंस्कार करायला नातलग जात नव्हते अशा वेळी धाऊन आले ते नगरपालिका, महानगरपालिका, बरोबर स्वयंसेवी संस्था व ग्रामीण भागातील स्वयंसेवक व अन्य नागरीक, मृतदेहावर योग्य सोपस्कार पुर्ण न होवू शकल्याने नंतर यथावकाश वर्षश्राध्द पार पाडले गेले.

हाच अनुभव लक्षात घेता व प्रत्यक्ष अनुभवता तालुक्यातील चिंचोली येथील सरपंच गणेश हारदे, उपसरपंच विलास लाटे व तरुणाईने गावातील कोरोना संक्रमणाने निधन पावलेल्या एकुण एक सर्वांना सामुहिक श्रध्दांजली अर्पण करण्याचा बरोबरच पंचक्रोशीतील सर्वांना भोजन देण्याचा कार्यक्रम घेण्याचे निश्चित केले. मग त्यावर विचार मंथन होत अखेर महंत ह.भ.प. उध्दव महाराज यांच्या कानावर ही गोष्ट घातली. त्यांनी क्षणाचाही विलंब न लावता कार्यक्रमाला येण्याचे मान्य केले नि आलेही.

कार्यक्रम अतिशय योग्य नियोजनाने पार पाडला. महाराजांनी या जगावेगळ्या कार्यक्रमाचे तोंड भरून कौतुक करत ज्येष्ठांकडून साहजिक आहे पण चिंचोलीतल्या तरूण वर्गाकडून हा सामुहिक श्रध्दांजली चा कार्यक्रम होतो आहे तोही भरगच्च स्वरूपात अशी तरूण मुले जी जनतेचे पाठिराखे होतात. त्यामुळे मोठ्यात मोठी संकट चुटकी सरशी पार करता येतील त्यासाठी गावोगावी अशा तरुणांची गरज असल्याचे आवर्जून नमूद केले. 

मात्र यातही मिठाचा खडा तो पडलाच... येत्या डिसेंबर महिन्यात ग्रामपंचायत निवडणूक होऊ घातली आहे.  त्याचा वास मात्र या कार्यक्रमानिमित्ताने जाणवला. ज्यांची ज्यांची म्हणून व्यक्ती कोरोनाने दगावल्या त्यांचेच नातेवाईक यानिमित्ताने दिसले नाहीत तर नेहमीच ईलेक्शन मोड वर असणारे तथाकथित गाव पंचांनी या अनोख्या कार्यक्रमाकडे पाठ फिरवली. निवडणूका येतील जातील हो पण गेलेला माणूस नि गेलेली वेळ परत नाही. मागे घेता येणार नि सुजाणास ते काय सांगावे की अशा दर्द भरलेल्या क्षणी श्रेयवाद जपायचे नसतो, जपायचा असतो तो एकमेकांच्या ह्रदयातील स्पंदनाचा हलका व नाजूक स्पर्श... जो आयुष्यभर एकमेकांची स्पंदन जपत जाणारा व ती स्पंदन कमी होत असताना निश्चितच हळूवार जपणारा...

काही का असेना आयोजित केलेला कार्यक्रम गोरगरीब कुटूंबातील कोरोनाने गेलेल्या आप्तेष्ठाप्रती सहसंवेदना जागृत करणारा निश्चितच म्हणता येईल.