महात्मा फुले कृषि विद्यापीठात आवळा फळ प्रक्रिया प्रशिक्षण कार्यक्रम संपन्न
राहुरी विद्यापीठ : आवळा हे फळ क जीवनसत्व मोठ्या प्रमाणात असलेले बहुउपयोगी फळ आहे. कोविड काळामध्ये विटामिन क च्या गोळ्यांचा वापर मोठ्या प्रमाणात झाला होता. अशाप्रकारे औषधी गुणधर्माने युक्त असलेल्या महत्त्वाच्या आवळा प्रक्रिया प्रशिक्षणामधून तुम्हाला मिळालेल्या ज्ञानाचा उपयोग तुम्ही आवळा प्रक्रिया उद्योग सुरू करू शकता. त्यायोगे एक चांगला स्वतःचा ब्रँड विकसित करा. या प्रक्रिया उद्योगातून तुम्ही समाजाच्या स्वास्थ्यासाठी खात्रीशीर पदार्थ निर्मिती करू शकता. यातून तुमच्या स्वयंरोजगारामुळे समाजातील इतरांनाही रोजगार उपलब्ध होईल असे प्रतिपादन महात्मा फुले कृषी विद्यापीठाचे विस्तार शिक्षण संचालक डॉ. गोरक्ष ससाणे यांनी केले.
महात्मा फुले कृषी विद्यापीठाचे कुलगुरू डॉ. शरद गडाख यांच्या मार्गदर्शनाखाली विद्यापीठातील अन्नशास्त्र व तंत्रज्ञान विभागांतर्गत पाच दिवसीय आवळा फळ प्रक्रिया प्रशिक्षण कार्यक्रमाचे आयोजन करण्यात आले होते. या प्रशिक्षण कार्यक्रमाच्या समारोप प्रसंगी झालेल्या कार्यक्रमाच्या अध्यक्षस्थानावरून डॉ. गोरक्ष ससाणे बोलत होते. यावेळी अन्नशास्त्र व तंत्रज्ञान विभाग प्रमुख डॉ. विक्रम कड, उद्यानविद्या विभागातील काढणी पश्चात तंत्रज्ञान विभागाचे प्रमुख डॉ. जितेंद्र ढेमरे, जनसंपर्क अधिकारी डॉ. भगवान देशमुख व डॉ. बाबासाहेब भिटे उपस्थित होते.
यावेळी कार्यक्रमाचे प्रास्ताविक करताना डॉ. विक्रम कड म्हणाले की विद्यापीठाचे तंत्रज्ञान जास्तीत जास्त व्यक्तींपर्यंत पोहोचण्यासाठी अशा प्रकारच्या प्रशिक्षण कार्यक्रमांचा उपयोग होत आहे. आतापर्यंत झालेल्या प्रशिक्षण कार्यक्रमातून अनेक व्यक्तींनी स्वतःचे उद्योग सुरू केले आहेत. ही गोष्ट आमच्या अन्नशास्त्र व तंत्रज्ञान विभागाच्या दृष्टीने भूषणावह आहे. याप्रसंगी आशिष आणेराव, नाथा देशमुख व प्राजक्ता राऊत यांनी मनोगत व्यक्त केले. यावेळी मान्यवरांच्या हस्ते प्रशिक्षणार्थींना प्रमाणपत्राचे वाटप करण्यात आले.
या प्रशिक्षण कार्यक्रमामध्ये प्रशिक्षणार्थींना आवळा प्रक्रियायुक्त पदार्थांची निर्मिती ज्यामध्ये आवळा कॅन्डी, आवळा गर साठवणे, आवळा लोणचे, आवळा सरबत, आवळा सुपारी, आवळा मुरंबा, आवळा सिरप आणि आवळा पावडर तयार करण्याचे प्रशिक्षण देण्यात आले. त्याचबरोबर अन्न सुरक्षितता व मानके, कायद्याची माहिती प्रक्रिया, उद्योगाची नोंदणी, उद्योगासाठी लागणारी मशिनरी व त्यांची देखभाल, पदार्थांचे पॅकेजिंग आणि मार्केटिंग, प्रक्रिया उद्योगासाठी शासनाच्या कर्ज योजना, अनुदान यासंबंधीची माहिती देण्यात आली. कार्यक्रमाचे सूत्रसंचालन राहुल घुगे यांनी तर आभार डॉ. बाबासाहेब भिटे यांनी मानले.
या प्रशिक्षणासाठी मुंबई, पुणे, सातारा, अहिल्यानगर, जालना व नंदुरबार या जिल्ह्यातून आलेले 16 प्रशिक्षणार्थी उपस्थित होते. या प्रशिक्षण कार्यक्रमाच्या यशस्वीतेसाठी अन्नशास्त्र व तंत्रज्ञान विभागातील पोपट खर्से, श्रीमती सविता धनवडे आणि सुभाष माने यांचे योगदान लाभले.
0 टिप्पण्या